. قصة #الدولار بالعراقي وسعر صرف - موسوعة الربيع */ --> -->
News

قصة #الدولار بالعراقي وسعر صرف

 


قصة #الدولار بالعراقي 
........
الحكومة تبيع نفط بالدولار
وتستلم فلوس النفط من الشركات بالدولار

الحكومة مطلوب منها توزع رواتب وفلوس للناس.
بس اكو مشكلة ، الحكومة توزع بالدينار ومتوزع بالدولار.

لهذا حتى تحول الحكومة الدولار الى دينار عراقي 

الحكومة تبيع الدولار من خلال البنك المركزي للبنوك الثانية ولكل من يريد يشتري حتى يصير عدها فلوس عراقي.

هنا الحكومة حولت فلوس النفط الدولار الى فلوس عراقية حتى توزع رواتب للعراقيين. 

اللعبة وين : 
اللعبة ان 
قيمة ال 100 دولار كانت 124 الف دينار قبل الصعود.
هسه صارت قيمة ال 100 دولار 130 الف.
وممكن تصير قيمة ال 100 دولار 150 الف .

يعني الحكومة راح تربح من 5 الاف الى 25 الف دينار على كل 100 دولار تبيعها من البنك المركزي.

وبهالطريقة راح تجمع فلوس وتعوض العجز وتوزعها رواتب.

راح تكلي هوب هوب يمعود شدتسولف ، البنك المركزي ديبيع دولار هسه 119 بس تجار الدولار ديبيعوه ب 133 . 

راح اكلك باختصار البنك ديحاول يصنع توازن بالسوق وديضخ دولار رخيص حتى يخفف الصدمة عالسوق تدريجياً سواء على التجار او المستهلكين وهاي مرحلة انتقالية والبنك راح يبيع الدولار باكثر من 130 وما اريد اكول ممكن يصير ب 150 واكثر خلال الفترة الجاية.

يمكن واحد راح يجيني ويكلي برايك  هالشيء صحيح ؟

على المدى الطويل اكيد لا.
على مدار من 6 اشهر الى سنة ممكن تمشي الامور لكن بحذر وسياسة نقدية حكومية واضحة. 

زين المشرف عدنا سياسة نقدية واضحة وشفافة ؟ 
الجواب :
للاسف لا.

زين شنو راح يصير لعد دوختنا ؟؟
اسف حبيبي :

الي راح يصير قيمة العملة العراقية راح تتاثر وتتغير .
يعني شلون  ؟

يعني طبقة البيض كانت ب 4 الاف دينار . 
هسه طبقة البيض ممكن راح تصير ب 6 و ب 7 الاف دينار.

ليش ترتفع ؟؟ 

لان التاجر العراقي راح يشتري بيض من تركيا وايران بالدولار مو بالدينار ، والتاجر العراقي من يحتاج دولار يروح يشتري من البنوك والصيرفات ، والصيرفات راح تبيعه الدولار غالي ، فهو راح يبيع البيض غالي النا وهكذا مع كل السلع والخدمات.

المشكلة وين ؟؟
المشكلة راح يبيع البيض غالي وانت راتبك باقي مثل ما هو 700 الف . 

يعني شلون ؟؟
يعني ال 700 الف "راتبك " قبل صعود الدولار تجيبلك 175 طبقة بيض ، على اعتبار ان طبقة البيض ب 4 الاف . قسم 700 الف على 4 الاف راح تطلعلك 175 طبقة بيض. هاي بسعر الدولار القديم الي هو 124 الف .

بينما ال 700 الف "راتبك" بعد ما تجيبلك 175 طبقة بيض ، لان سعر الطبقة صار 7 الاف دينار 

يعني راتبك الي هو 700 الف راح يجيبلك 100 طبقة بيض بس لان الدولار صار ب140 الف وسعر الطبقة صارت ب7 الاف دينار.

الفكرة وين ؟؟ الفكرة الحكومة دتستخدم هالطريقة حتى تسد العجز المالي وتوزع فلوس ورواتب حتى توفر سيولة .

راح يجيني متخصص ويكول بس  هذا اسمه اقتصاد الفقاعة وخاضع لمضاربات لان الحكومة مو هي المتحكم الرئيس بالبنك المركزي ولا باسواق العملات. 

راح اكلك والله صدقت ، لهذا راح تبقى الامور خاضعة لمزاجيات المافيات الفاسدة الي ترفع وتخفض بكيفها باسعار الدولاروالبضايع. 

هنا الحكومة شسوت بالتحديد؟؟ 
الي سوته نقلت الازمة وحولتها لملعب التجار الي راح يرفعون الاسعار.

الحكومة هنا ، تكلك اني انطيتك راتبك كامل
اني شعليا بالي ديغلي عليك الاسعار.

يعني باختصار فروها على الشعب فرة خالد ابن الوليد.
#تحياتي_المشرف_العراقي
logo
يمكن لمتابعينا الاعزاء متابعتنا والتواصل معنا .
  • Facebook
  • Instagram
  • twitter
  • youtube
  • إدخال بريدك الإلكتروني للإشتراك في بريد الموقع السريع ليصلك جديد الموقع

    مواضيع ذات صلة

    There is no other posts in this category.
    التعليقات
    اخفاء التعليقات

    إرسال تعليق

    اهلا وسهلا بكم